გაყალბებული ფოტოსურათი, რომელზეც თითქოს დონალდ ტრამპის ინაუგურაციაზე მყოფი სალომე ზურაბიშვილია აღბეჭდილი, სოციალურ ქსელში 20 იანვრიდან ვრცელდება. ფოტოზე საქართველოს მეხუთე პრეზიდენტი აშშ-ს დროშის ინსპირაციით შექმნილი ვარსკვლავებიანი და ზოლებიანი წითელი მოსაცმელით არის წარმოდგენილი. მომხმარებლებმა, ვინც მანიპულაციას წამოეგო, მისი “შეუსაბამო” ჩაცმულობის გამო აღშფოთებული კომენტარები დაწერეს.
სინამდვილეში აშშ-ს 47-ე პრეზიდენტის ინაუგურაციაზე სალომე ზურაბიშვილი საქართველოს დროშის ფერებში იყო გამოწყობილი. მას ტრადიციულად ქართველი დიზაინერების სამოსი ეცვა. SITUATIONIST-ის ელეგანტური წითელი პალტო, რომლითაც ის კაპიტოლიუმში იმყოფებოდა დიზაინერ ირაკლი რუხაძეს ეკუთვნის.
ინაუგურაციის საზეიმო მიღებაზე კი, რომელიც სამხრეთ კაროლინის შტატის წარმომადგენლების მიერ იყო ორგანიზებული, სალომე ზურაბიშვილი ქართველი დიზაინერის თამუნა ინგოროყვას მიერ შექმნილი წითელი ატლასის კაბით და თეთრი ყელსახვევით გამოჩნდა.
